ЭЙФЕЛЬ ЯРУСЫ
ЭЙФЕЛЬ ЯРУСЫ, урта девон бүлегенең аҫҡы бүлексәһе. Эмс ярусында ята, живе ярусы м‑н ҡаплана. А.Дюмон тарафынан Эйфель тауҙарында (Германия) айырып күрһәтелә (1848).
Стратотибы мергель һәүерташтарынан, алевролиттарҙан, эзбизташ ҡатыш мергелдәрҙән тора; ҡалынлығы 450 м. Брахиоподалар, мәрйендәр, трилобиталар хас. Э.я. ултырмалары БР терр‑яһында киң үҫешкән, платформалы өлөшөндә скважиналар м‑н асылған. Көньяҡ Уралдың көнбайыш битләүендә Э.я. бийск горизонтының органоген эзбизташтарынан һәм афонин горизонтының кремний һәүерташтары ҡатыш битум эзбизташтарынан ғибәрәт, ҡалынлығы 220 м тиклем; көнсығыш битләүендә ирәндек свитаһының һәм ҡарамалыташ свитаһының вулкан һәм вулкан‑ултырма ҡатламдарынан тора, ҡалынлығы 5000 м тиклем.
Әҙәб.: Либрович Л.С. Геологическое строение Кизило‑Уртазымского района на Южном Урале //Труды ЦНИГРИ. Л.; М., 1936. Вып. 81; Девонские отложения Башкирии. Ч.1. Стратиграфия. М., 1961; Маслов В.А., Артюшкова О.В. Стратиграфия и корреляция девонских отложений Сибай‑Баймакского района Башкирии. Екатеринбург, 2002.
В.А.Маслов
Тәрж. Э.М.Юлбарисов
