ДЕГТЯРЁВ Александр Николаевич

ДЕГТЯРЁВ Александр Николаевич (8.4.1952, БАССР‑ҙың Бөрө районы Иҫке Петров а.), иҡтисадсы. БР ФА‑ның мөхбир ағзаһы (2012), иҡтисад фәндәре докторы (2002), профессор (1997). БР‑ҙың атҡаҙанған фән эшмәкәре (2002), БР‑ҙың атҡаҙанған иҡтисадсыһы (2021), РФ‑тың почётлы юғары профессиональ белем биреү хеҙмәткәре (2002). ӨАИ‑ны тамамлағандан һуң (1973) шунда уҡ эшләй (1978 й. алып өлкән ғилми хеҙмәткәр), 1987 й. башлап КПСС‑тың Башҡортостан өлкә комитетында фән һәм мәғариф бүлеге мөдире урынбаҫары. 1990—2011 йй. ӨДИСА‑ла ректор, бер үк ваҡытта социаль‑мәҙәни сервис һәм туризм иҡтисады кафедраһы, 2005 й. башлап иҡтисад теорияһы һәм донъя иҡтисады кафедраһы мөдире. 2011 й. алып РФ Дәүләт думаһының 6‑сы саҡырылыш депутаты: 2014 й. тиклем мәғариф буйынса комитет һәм депутат этикаһы буйынса комиссия рәйесе. 2014—15 йй. ӨДАТУ ректоры вазифаһын башҡарыусы. 2016 й. башлап БР ФА вице-президенты, бер үк ваҡытта 2020—22 йй. “БР‑ҙың Стратегик тикшеренеүҙәр институты” дәүләт автономиялы ғилми учреждениеһы директоры. Фәнни эшмәкәрлеге институциональ иҡтисадҡа, социаль‑иҡтисади системаларҙың үҙгәреүе проблемаларына арналған. “Һәләтле балалар” коммерцияға ҡарамаған хәйриә фонды рәйесе (2002 й. алып). “Вестник Академии наук Республики Башкортостан” (2006—11, 2022 й. алып), “Теоретическая и прикладная экономика” (“Теоретик һәм ғәмәли иҡтисад”; 2014 й. алып), “Финансы и управление” (“Финанстар һәм идара итеү”; 2022 й. алып), “Уфимский гуманитарный научный форум” (“Өфө гуманитар фәнни форумы”; 2020 й. алып) журналдарының баш мөхәррире. БР Дәүләт Йыйылышы—Ҡоролтайҙың 3—4‑се саҡырылыш депутаты. Халыҡтар дуҫлығы (2012), Салауат Юлаев (2022) ордендары менән бүләкләнгән.

Хеҙм.: Институциональные основы развития малого предпринимательства в XIX—XX вв. (на примере Башкирии). Уфа, 2001; Государственное управление финансами в Башкирии. Ч.1. (Уфимская губерния). М., 2011 (авторҙ.); Конверсия институтов. Начала теории. М., 2020.

Тәрж. Г.Ҡ.Ҡунафина